(Rasım Qaraca (1
راسيم قاراجانين اشيالار شئعرينه بير باخيش
(راسیم قاراجا(۱
محمود مهدوی
كول قابي: بو سفر ايچينه كول تؤکمهدیم/ توخوم قابيغي آتماديم/ بو سفر/ قيريلميش مونجوق دنهلريني/ توپلاييب/ قويدوم كول قابينا/ قارانليقدا/ ايشيل ـ ايشيل مونجوقلار
بئله گؤرونتولري راسيمين شئعرينده گؤردوكجه ماراقلانيرام. راسيم يوموشاقجاسينا كولون يئريني مونجوقلارلا دَييشدييي زامان ائله بيل نئچه ايلكي، چيركين ساختا قاليبلرين چوپور اوزونه رنگلي بزكلي مونجوقلاري سپيب اونلاري اوتانديرير. بو شئعرده گؤزليكله اينجهليك داشلانديغينا گؤره، دؤنهلرله اوخوجو اونو اوخويوب ديلينين ازبرينه چئويرير. هابئله بير خيرداجا كول قابيدا مونجوقلار ايشيلداديقجا كدرلي آنلار بيزي ييرغالاييب، يئري گلسه ده آغلاتماغا يؤنلدير.
منجه كول قابي، جوراب و شوكولات شئعرلرينده «ايشيل ـ ايشيل»، «ميشيل ـ ميشيل» و «يام ـ ياشيل» كيمي وصفلر، راسيمين شئعرلريني كؤهنه قاليبلره ياخينلادير. میثال اولاراق، کلاسیک شاعیرلر سؤز قیتلیغینا یئتیشنده بئله- بئله کلمهلره یاپیشیرلار. حالبوكي راسيم مودئرن دوشونجهني منيمسهين شاعيردير و شئعرلرينه گلديكده بئله بير وصفلر اوخوجونو او يئنيليكدن يايينديريب، زاماني كئچميش مينلرجه يازيلميش شئعرلرين سيراسينا آپاريب چيخارير.