یاشماق سیرا کیتابلاریندان بیرینه باخیش

هي ديلسيز دلي‌لريم/ هئي.../ اينديسه چنلي بئليميز/ يالنيز/ آنا ديليميز!

5ـ جي شئعرين باشلانيشي چوخ دهشت‌ليدير. شاعير بو سطيرله آشيق‌لار ساياغي بيزي آپارير كوراوغلونون يئني‌لشميش «چنلي بئلي»ينه؛ همن يئر كي: «يالنيز/ آنا ديليميز»دير. اينانمالي دئييل، كئچميش ادبياتدان بئله گؤز‌ل ـ گؤيچك قيدالانماق دا اولارميش! بو شئعري اوخوياندان سونرا، آيدينا پاخيلليغيم گلدي. اؤز اؤزومه دئديم نه اولاردي بو شئعري من سؤيله‌يه‌يديم؟!

بو يئر دئدييين/ تورپاقلي بير آلما/ ايسلانميش بير توپ/ دئدييين يئر بو!

6ـ جي شئعر، كيتابين اوز قابيغينا يول تاپميش شئعردير. يئر كوره‌سيني ايسلانميش آلمايا اوخشاتماق، هر كسين فيكرينه گلمه‌ين گؤرونتولردن بيري‌دير. بو دا آيدينين ياددا قالان اس ام اس‌ليك بير تؤحفه‌سي ايسته‌ديك‌لريميزه.

من سني اونوتدوم/ سن ايسه/ اونوت سئوگيني!

7ـ جي شئعر، تورش مزه‌لي يئمه‌يه اوخشايير، دئمه‌لي آدامين آغزينين سويونو آخيدير. يئيندن سونرا، (شئعري اوخوياندان سونرا) بوغازيندان آجي بير داد ايچه‌رييه گئدير، سنين ايسه اليندن هئچ ايش گلمه‌ين حالدا قاليرسان يانا يانا. بلكه ده، اونا گؤره، آيدين ايكي «اونوتماني» اوچ سطيرده بيزه يازميش!!

سئوگيدن/ سولان گؤنلوم/ سودا بوغولان/ باليغا بنزر!

8ـ جي شئعرده، سئوگيلي‌سيندن جفا گؤرموش وورغون، دنيزده بوغولان باليغا بنزه‌ديليب. معنوي و عرفاني بير حيس آلماق اولار بو شئعردن. ائله بيل باليق دنيزين عظمتيني باشا دوشندن سونرا اؤلوب. يادا كي، چوخ اوزدن گئتمه باخساق، بيري‌نين اؤز سئوگيليسيندن جفا گؤرمه‌سيني باشا دوشه بيلريك.

گؤزلرين تاي كئشيك/ باشماق كيمي‌دير/ بيري سئويرم دئسه‌ده/ بيريسي دانير

10ـ جي شئعرده، سئوگينين گؤزلري تاي دَييشيك باشماغا اوخشاديليب. عجيب و معنالي بير اوخشارليق! هميشه تاي دَييشيك باشماغا باخاندا اونلارين آيري آيري يوللارا گئتمه‌يي خاطيرلانير. بو شئعره گلديكده، اينجي بير دوشونجه اوخوجونو حاللانديريب اونو دؤنه دؤنه بو شئعري اوخوسون دئيه ماراقلانديرير.

سايماق باشارميرام!/ سئومك باشاريرام!/ ائله اولوب ايكيسيني بيردن سئوميشم!/ ائله اولوب بيريني ايكي يول سئوميشم!/ نه ائيله‌مك/ سئومك باشاريرام/ سايماق باشارميرام...

11ـ نجي شئعرده، سون اوچ سطير، اوسته‌كي سطيرلرين آچيقلاماسي‌دير. منجه يازيچي و شاعير، قيييم‌سيز آداما اوخشايير. اونا گؤره، سؤزجوك‌لرين ايشلتمه‌ييينده «كامران خانليق» گره‌كلي‌دير. اوخوجو ايسه، بوردا، «كامران شاعيرين!» گؤزو دارليغيندان حظ آپاراجاق‌دير.

سنه يا «سن» دئمك/ يا «سيز» دئمك/ آمما «سن‌سيز» نه دئمك...

17ـ جي شئعر، سئوگيلي‌سيز دونياني ـ داها دوغروسو ـ حسرت عالميني سؤيله‌يير. بو قيسا شئعر، هر اوخونوشدا، ايستكلي كده‌ري گتيرير اوره‌ييمه. ‌بونا باخماياراق، يئنه اوخويوب حالي پوزولموش‌لار كيمي يئنه اوخويورام...

سن ايندي/ اؤنومده آچيلان/ آغلاديجي بير بومبا/ من ايسه/ ايكيميزين يئرينه آغلايان/ بيريسي!

21ـ جي شئعرده، شاعير سئوگيليسيني بير آغلاديجي بومبايا بزه‌ديب، اونون يوخلوغوندا ايسه ايكي نفر عوضينه آغلاديغيني سؤيله‌يير. بو شئعر توپلوسوندا، مودئرن باخيش‌لار ائله بورالاردان شئعر فورماسينا يول تاپميش. بومبا پارتلاديجي شئي‌دير، آنجاق سئوگي ياشام باغيشلايان، شادليغي پايلاشان!

گؤره‌سن شاعيرين ياشاديغي دونيا بو قده‌ر قورخولودوركي، آغلاماقدان سونرا بير ايش گؤرمك اولمور؟!

چاي/ سيقارئت/ بير ده تورك راكي‌سي،/ بوتون سنسيز‌ليييمه سئچديييم/آجي‌لار!

23ـ جو شئعر، آيدينين گؤزه‌ل شئعرلريندن بيري‌دير. چاي، سيقار و راكي شاعيرين تك‌ليييني دولدوران‌دير. آنجاق بونلارين هاميسي آجي بير گئرچك. سئوگيلي شئعر فضاسيندان چيخيب، بوتون آجي‌لار ايسه شاعيره قيسمت اولوب. سيقارئتي/ سيقارئتله/ آليشديرماقدير/ سنله اؤپوشمك!...

26ـ جي شئعرده دئمه‌لي او اودلو اؤپوش، شاعيرين سيقاري سيقارين داليسيجا، يادا اودو اودلا آليشديرماقدان يارانميش. ائله ‌بيل بو ديدرگين دونيادا شاعيره قالان چايلا سيقاردير. گؤره‌سن بو سؤز نه قده‌ر دوغرودورمو؟

سئوديجه‌ييم!/ سانيرام سوچ‌لاريني/ ياري بؤله بيلريز/ بيزلر اورتاق سوچ‌لاردان/ يارانميشيز!

29ـ جو شئعرده، شاعيرين يازديغينا گؤره، اونلار ـ بو ايكي شاعير البته معنا عالمينده ـ اورتاق سوچ‌لاردان يارانيب‌لار. منجه بو شئعرين ائروتيك مايه‌لري وار. بوردا، اورتاق‌ همن اورتا يوخسا وسط ‌دئمه‌ييي‌دير. باشقا بير يؤندن سوچ‌دا گوناه آنلاميندادير. بونلارين بير يئرده اولماسي، همن آدامين بدنينين اورتاسيندا اولان جينسي آلته ‌ده دلالتي اولا بيلر. بو اوزدن كيتابا دا بو آدي سئچمك سبب‌سيزده دئييل‌ميش.

كيشي!/ بو آلاتورانليقدا/ بو نه تردير آخير سندن؟/ ـ سن گؤرن تر دئييل/ قاندير آخير كؤلگه‌مدن!

30ـ جو شئعر، تخيولاتين سون درجه‌ده گؤزل‌ليييي‌دير. «كؤلگه‌دن قان آخير». من بو سطيرده كؤلگه‌نين قارا بوياسيندا قيرميزي بويالي قانين سوزمه‌سيني‌ گؤركملي بير گؤرونتو كيمي گؤرور‌م. بو شئعرين اول آخيري مؤحكم، دويغولو و داهادا اينجه اينجه احساسلا يازيليب.

سنسيز/ ديليمين بوتون سؤزجوك‌لري/ سس‌سيز!

31ـ جي شئعر؛ يئنه آيدين بَي‌يين اللري وار اولسون. گوجلو، قيسا و دَيَرلي اس ام اس‌ليك بير ياددا قالان شئعر.

فيلترلر سيقارئت‌لر ايچين/ ياشاييرلار/ سيقارئت‌لر‌سه/ فيلتر‌لر ايچين/ اؤلورلر.

36ـ جي شئعر، يئنه شاعيرين سيقارلارلا ياشاديغي آ‌ن‌لارا عاييددير. دريندن قوللاب ووروب فيلتره چاتديغيني گؤردويو زامان باشا دوشور «سيقارئت‌لر/ فيلترلر ايچين/ اؤلورلر».

آخير سؤز: شاعيرين سنتي و مودئرن باخيشي بير بيريله گولشمه‌ده‌دير. نهايتده‌ده مودئرن فيكير گوج گليب يئني يئني شئعرلرين دوغولماسينا سبب اولوب.

 

 

يازاري محمود مهدوی پنجشنبه 2 خرداد1387 ساعات 20:2 | |

---