(yeni nesil yeni iz (3

يئني نسيل، يئني ايز (3) شاعير

(دومان اردم)

هر نه قورتاردی شعر باشلاناندا!

دانيشيغي آپاران: محمود مهدوي

 

آذياز: دومان اردم­ (جولفا، 1362)/ شاعیر. سون آی­لاردا، اونون "اؤپ اؤلومونو" باشلیقلی شعر کیتابی ایشیق اوزو گؤرموشدور.

***

آذیاز: يازديغين شعرلرده اوچ اؤنملی اؤزللیک گؤرور‌م: الف ـ سرخوشلوق (قيسا شعرلرده)، ب ـ آجي ياشام (اوزون شعرلرده)، ج ـ عوصيانكارليق (شعرلري­نين یوزه دوخسانیندا). بونلارين هاردان گليب نئجه اولدوغونا گؤره دانيشاسان.

ـ البته کی، دونیا بیزه هئچ زامان تکجه آجی­لارییلا گؤرونمور. یاشادیغیمیز آنی­لاردان سرخوش دا اولوروق، اوزولوروک ده. هردن قوراقلیقداییق، هردن ایسه دنیزده. عوصیانکارلیق منیم شخصی و روحی اؤزللیک­لریمدن­دیر. بو دا، شعرلریمده گؤرونه بیلر. هئچ زامان سویون لام آخارینا و اونون سس­سیزلییینه اینانمیرام. ریسکی چوخ سئویرم. ادبیاتیمیز، منجه، داها ساکیت سو کیمی آخمامالی­دیر. داها نورمال آددیملاماق دورومو یاخشی دئییل. بیز زاماندان و دونیادان چوخ دالیییق. بو گون، ریسک ائتمک، اؤزونو داغا داشا وورماق، سیناق­لاردان کئچمک بیزیم اوچون ان نورمال وضعیت­دیر.

 

آذیاز: يازديغين قيسا شعرلر، داها آرتیق آدامين جانينا سينير. اونلارلا ایسه علاقه قورماق راحات­دير. آنجاق اوزون شعرلري­نين چوخو، اوخوجويلا  ايلگي ساخلاماغا يول وئرمير. نييه بئله‌دير؟

ـ البته بو سیزین شخصی نظرینیز کیمی اولا بیلر. چونکو اوخوجولاریمین بیر چوخو دا بونون ترسینه دوشونورلر. سیزین ده سؤزونوزو قوربته سالمیرام.

 

آذیاز: بو جاواب اولمادي. هر حالدا هاچاندان شعر يازماغي باشلادين؟

ـ ایگیرمی ایکی یاشیمدان بری.

 

آذیاز: هاچان­لار يازيرسان؟

ـ دقیق دئمک اولمور. ائله واخت اولور کی، گئجه یاریسی یوخودان آییلیب یازیرام... آنجاق ائله واخت دا اولور کی، خیاباندا. پارکدا. ایش یئرینده سوژئتیمی گؤرنده، نوت گؤتورورم.

 

آذیاز: پارا قالميش شئعرلريني نئيله‌ييرسن؟

ـ اونلاری بیر گون یئنیدن یازاجاغام دئیه، یوخسا فاتیحه وئریب قبریستانلیغا گؤندَره­جه­یم دئیه یاری قالمیش شعرلریمی کؤهنه دفترلریمله بیرگه ساخلاییرام.

 

آذیاز: دئييرلر «شاعيرلر اولماسايدي، دونيادا ياشاماق چوخ چتين اولاردي»، ائله‌ديمي؟

ـ منجه، بو، بیر آز اغراق اولار. دوزونو، ادبیات اولماسایدی، نه اولاجاقدینی بیلمیرم... مسئله بیر آز کومیک­دیر. ایندی، دونیادا نه­لر یوخدور؟ بیز اؤلموشوک­مو؟ نه­لر اولا بیلردی؟ بیز اونلارا نئجه تپکی گؤستره­ردیک؟

 

آذیاز: «دومان» آديني نئجه سئچدين؟

ـ اوغلان آدلاریندا، سونو "ان"ـلا قورتاران و ایکی هیجالی اولان آدلاری سئورم.

 

آذیاز: شئعردن باشقا، آيري بير ژانردا دا يازيرسان؟

ـ اساس ژانریم شعردیر، آمما حئکایه­لریم ده وار (اصلینده بیر ایکی اؤیکوم وار). سون گون­لرده، پیئس (نمایشنامه) یازماق هوسینده­یم... اوست اوسته، بیر بیریندن چوخ فرقلی اولان ژانرلاردا یازماغی دوشونورم.

 

آذیاز: كيتابدا گئدن بعضي يازي­لار طرح ده اولا بيلمه‌ييب­دیر، آنجاق اونلاري گوجلو شئعرلرينله ياناشي گتيرمه‌يين، ايشيني حرفه‌اي عالمیندن اوزاقلاديب­دیر. بس نييه بئله؟

ـ هئچ بیر گوجلو کیتاب نؤقصان­سیز دئییل! منیم ده بیرینجی کیتابیمدا چاتیشمامازلیق­لار وار، آمما اوغورلو نؤقطه­لرییله قیاسدا، اوغور قات قات چوخدور... ضعیف شعرلر، بارماق ساییسی قدَر اولار نهایت!!

 

آذیاز: بورا اؤز آراميزدي اؤزونو بَتَر بَه‌يَه‌نيرسن آ! ايندي دئه داريخماق‌لاريني نه دولدورور؟

ـ هئچ زاد!

 

آذیاز: دوغرودان ايش‌سيز، سيغورتاسيزسان يوخسا...

ـ یوخ... آنجاق یاشادیغیم توپلومون بیر چوخو،  بو دورومدا یاشاییر. بو فلاکتلی حال­لاردا، بیزیم مجرد لیریکا یازماغیمیز بیر آز مضحکه کیمی گؤرونور. بیز تکجه اؤزوموز دئییلیک. ایچیمیزده مین­لرجه اینسانین باغیرتیسی، گؤز یاشی، قاققیلتیسی وار. بونو دویمالیییق.

 

آذیاز: یئنی نسيللی شاعيرلرين گؤركملي‌لري؟

ـ گلین بو قونویا توخونمایاق. باشقالاری کیمی، بوشو بوشونا بئش آلتی شاعیرین آدینی گؤیون یئددینجی قاتینا قالدیریب علمی فاکت­لارا دایانمادان بیرینی مدرن یا پست­مدرن تانیتدیریب، هم­یئرلی­لیک اوزوندن دوستلوق اوجباتیندا ادبیاتیمیزی روشوت بازارینا چئویرمکدن خوشلانمیرام. منیم اؤز یئرلیمه بوشو بوشونا پپسی آچماغیم بوش شئی­دیر. یارادیجیلیغی زامان اثبات ائده­جک و بونا اینانیرام کی، اصیل معنادا شعرین اؤنونده بونلار دا دیز چؤکه­جک.

 

آذیاز: ايران آذربايجانيندا يئني نسيلیمیزدن یاییملانمیش شعر كيتاب­لارين ان گوجلو داماري؟

ـ گوجلو دامار تانیمیرام من. تانییان وارسا، منه ده تانیتدیرسین. آچیقجاسی، شعریمیزی تعریف­له­ین­لرین باشینا هاوا گلیب... هله­لیک، ادبیاتیمیز ایت گونونده­دیر. قونشو ادبیات­لارلا توتوشدوردوقدا ایسه دوروموموز یاخشی دئییل... چوخ دا پیس­دیر.

 

آذیاز: "دومان" يولداش­لاري­نين آراسيندا نه اؤزللیک­له تانينير؟

ـ بیلمیرم!

 

آذیاز: هنر عالمينده شعر قولونو سئچديیي­نين سببي؟

ـ یئنی­یئتمه چاغ­لاریمدا عاشیق اولدوم، سونرا ایسه بوراخدیم عشقه عایید هر نه­یی. رساملیقلا مشغول اولدوم،  سونرا اونو دا بوراخدیم. دیواردا یازدیم، گیتار چالدیم، کوچه­لره دوشدوم... هر نه­یی بوراخاندان سونرا، شعری تاپدیم. داها دوغروسو، هر نه قورتاردی شعر باشلاناندا.

 

آذیاز: شعرلريني بيرينجي دؤنه اولاراق، كيمه اوخويورسان؟

ـ راست گلمه­سینه قالیب­دیر. بللی اولمور.

 

آذیاز: شعرلريني اصول اوزره تنقيد ائدن­لرين سايي؟

ـ هله بورا کیمی تنقید ائله­ین اولماییب­دیر! شفاهی اولاراق، بعضیسی بوشو بوشونا آلقیشلاییر، بعضی­لری ایسه چیرپیر. آنجاق یازیلی اولاراق، هئچ نه یوخدور... بو دا، ادبیاتیمیزدا تنقید­چی­نین یوخلوغوندان ایره­لی گلیر. البته بارماق ساییسی قدَر تنقید ایشینه یاناشان­لار دا، اؤز شخصی منافع­لرینی قووالاییرلار.

 

آذیاز: هانسي شاعيردن شعر اوخودوغوندا شعر يازيرسان؟

ـ باشقا شاعیردن شعر اوخودوغومدا، شعر یازمارام.

 

آذیاز: يئني نسيلين يئني شعرلر يازماغینداکی چتين‌ليك‌لر؟

ـ آنا دیلیمیزله اصیل معنادا دوغمالیغین اولماماسی. اجتیماعی دوروم. قایناق آزلیغی. توپلومدا هنره یئر ویریلمه­مه­سی. تنقید یوخلوغو... سایماقلا قورتارمیر!

 

آذیاز: "دومان"ـين شعرلريندن هاچان دومان چكيليب قارا بولودلار ايته‌جك؟

ـ اوجاق توتر دومان قالیر

يازاري محمود مهدوی سه شنبه 12 شهریور1387 ساعات 16:26 | |

---