(yeni nesil yeni iz (2

رضا کاظمی ـ اؤيكوچو

گئجه هامی یاتاندان سونرا!

دانیشیغی آپاران: محمود مهدوی

 

*****

ـ یارادیجیلیق دونیاسینا نئجه گیریشدین؛ اولمایا سن ده چوخ­لاری کیمی شعر سؤیله­مک­له یازماغی باشلاییب­سان؟

ـ ائله­دیر، ایلک اؤنجه شعر دئمک­له باشلادیم! هله اون­اوچ یاشیما دولمامیش، قالین بیر شعر دیوانی یازماق فیکرینه دوشدوم... شعر سؤیله­مک اوچون سئوگی گوجو گره­ک­دیر سؤزونو ائشیتدیییمدن، یئنی­یئتمه­لیک عالمینده بیر سئوگیلی آختاریب اونا وورولماغا چالیشدیم. آمما بو چالیشمانین هئچ بیر سونوجو اولمادی، من عاشیق اولا بیلمه­میشدیم! دیوانیم اوچون آییردیغیم یوز صحیفه­لیک دفترده ایسه یالنیز بیرینجی صحیفه­سینده قیسا بیر غزل یازمیشدیم.

ـ یازماغی هاچاندان باشلادین؟   

ـ بیلیم­یوردا گیردیییمده (75)، فارسجا اؤیکو یازماغی جیددی اولاراق باشلادیم و او زامانین دَیرلی ادبی درگی­لرینده (او جومله­دن «عصر پنج­شنبه» کیمی نشریه­لرده)، اؤز اؤیکولریمدن ده یایمیشام. آنجاق بیلیم­یوردون سون ایل­لرینده (و درس اوخوماقدان انصیراف وئرمه­میشدن قاباق)، گئت­گئده تورکجه یازماغا دا ماراقلاندیم... دئمه­لی، 26 یاشیمدا ایکن هله تزه تزه آنا دیلیمین یازی پوزوسونو اؤیرنمه­یه باشلامیشدیم.

ـ هانسی یازیچی­لار سنی یازماغا ماراقلاندیریر؟

ـ «گابریل گارسیا مارکز»، «جی. دی. سلینجر»، «ژوزه ساراماگو»، «ارنست همینگوی»، «فرانتس کافکا»، «اورهان پاموک»، «هنری میلر»، «ایزابل آلنده»، «خوان رولفو»، «لطیفه تکین»، «خورخه لوییس بورخس»، «هوشنگ گلشیری»، «جومپا لاهیری»، «آفاق مسعود»، ... و یئنه دئییم­می؟! چوخ­لاری آمئریکالی و لاتین آمئریکالی­دیلار.

ـ یازی­لارینداکی سرخوشلوق هاردان گلیر؟

ـ بلکه ده یاشامیمدان!

ـ ژورنالیزمی آرتیق سئویرسن، یوخسا اؤیکو یازماغی؟     

ـ اؤیکو یازماغی، یوزه یوز.

ـ سن بوندان قاباق چوخلو اؤنملی درگی­لرده و قزئت­لرده یازیب، من بیلن ایسه اونلارا گؤره ده چوخ واخت قویوبسان. هئچ بیلیردین دوست­لاریمیزین بیر چوخو سنی ژورنالیست کیمی تانیییر؟!

ـ آنا دیلیمیزده چیخان بوتون نشریه­لرله امکداشلیق ائتمک من اوچون بؤیوک فخر ساییلیر؛ آنجاق بونلارین ایچینده حرفه­ای اولاراق (و امک پولویلا)، یالنیز «یارپاق» قزئتینده ایشله­میشم. اوردا ایلک اؤنجه امکداش­لار قروپوندا، سونرا یازیچی­لاری هئیتینده، سونرا ایسه بیرینجی معاونی آدییلا، و نهایت (اون­اوچونجو ساییدا، یعنی زامان باخیمیندان بیرینجی دؤورون سون نؤمره­سینده) باش­یازار معاونی کیمی چالیشمیشام. بیر ده، اوچونجو نؤمره­دن بری «سعید موغانلی» ایله بیرگه و البته دوکتور «ایواز طاها»ـنین یاردیمییلا «یارپاق»ـدا گئدن یازی­لارین ائدیتینی (یالنیز دیل قورولوشو یؤنوندن) اؤز اوزه­ریمه گؤتورموشدوم. دئمه­لی، ایکی ایل «یارپاق» قزئتینده ایشله­مک، دَیرلی تجروبه­لریندن علاوه، من اوچون گؤیدن دوشمه بیر درس کیلاسینا دا چئوریلمیشدی. بیز صوبحدن آخشاما یازی پوزویلا مشغول ایدیک، و بو سوره­ده دوکتور «ایواز طاها» غریبه بیر دؤزومله منه تورکجه­میزین دیل قورولوشونو اؤیره­دیردی. او زامان من هئچ بیر یئرده بئله کیمی آنا دیلیمیزین قرامئرینی اؤیرنه بیلمزدیم و بونا گؤره ده، یارپاقدا کؤنول­له ایکی ایل تمام چالیشدیم...  

ـ  ژورنالیست­لر سیغورتاسینا دا (بیمه روزنامه­نگاران) کئچیب­سن­می؟

ـ یوخ هله!

ـ ایندی نئجه؟ یئنه ژورنالیسم ایله مشغولسان؟

ـ ایندی­جه ادبی بیر ژورنالیست کیمی چالیشماغا چوخ ماراقلی­یام. مندن اؤیکو، شعر و راست گلسه ادبی تنقیدلرین گئتمه­سینی داها آرتیق بَینیرم...

ـ سؤیله­دییین سؤزلرین آردیندا، بیزه دئیه بیله­جک بیر آرزون وارمی؟

ـ اؤیکو ساحه­سینده بوراخیلان تام تورکجه بیر درگی­نین باش­یازاری اولماق، آرزولاریمدان بیری­دیر...

 ـ ریضا بَی! اؤیکولری­نین سوژئت­لریندن سؤیله؟ هاردان گلیر؟ قاباقجادان طرح یازیرسان­می؟

ـ بعضن بیرجه سؤزجوکدن اوزون بیر اؤیکو یارانیر، بعضن­سه گئجه گوندوز ائشیدیب گؤردویوم بؤیوک بالاجا اولای­لاردان، قزئتده­کی خبرلر و تلویزیونداکی ماجرالاردان. حتتا یوخولاریم دا منه سوژئت وئریر ...

ـ طرح نئجه؟ دئمه­دین؟!

ـ قالیب سوژئته. بعضی­سینه طرح یازیرام، بعضی­سینه یوخ!

ـ اؤیکولرینی بیر اوتورومدا یازیرسان، یوخسا پارا پارا و بیر نئچه اوتورومدا؟

ـ چوخراق بیر اوتورومدا یازا بیلمیرم؛ بونون دا ان اؤنملی سببی واختیمین دار اولدوغوندان­ ایره­لی گلیر. ایراندا و اوندان دولایی آذربایجاندا یازیچیلیق یازیچی­لارین ایکینجی، اوچونجو و بلکه ده دؤردونجو ایشی ساییلیر. بوردا بیری اؤیکو یازماقلا اؤز باشینی دولاندیرا بیلمیر، قالمیشدی ایندی عایله­سی­­نین باشینی دولاندیرسین... بونا گؤره ده، او بیری ایش­لرینی قورتارا بیلسن، واختین قالسا، حؤوصله­ن اولسا، یوخون گلمه­سه، گؤزله­نیلمز بیر ایش قاباغینا چیخماسا، بیر نئچه سطیر یازا بیله­جک­سن. او دا آللاه بیلیر نه چیخاجاق!

ـ بیر اؤیکونو قورتاریب آیریسی­نین سوراغینا گئتمک چتین­دیر یوخسا ...؟

ـ بو، اؤیکودن آسیلی­دیر. بعضی اؤیکولری قورتارمایینجا باشقاسینی یازا بیلمیرسن، بعضی­سینی ده ائله یاریدان بوراخیب او بیریسی­نین سوراغینا گئدیرسن.

ـ نئجه یازیرسان؟ کاغیذ اوسته، یوخسا بیلگی­سایار (كامپيوتر) آرخاسیندا؟

ـ چوخدان بری بیلگی­سایار دالیندا یازیرام. بئله یازماغین چوخ اوستونلوک­لری وار ایمیش.

ـ یازدیغین اؤیکولری ایلک اؤنجه کیم­لره اوخویورسان؟

ـ چوخراق حیات­یولداشیما. سونرا، اؤیکوچو یولداش­لاریما... بعضن ایسه دیلی­نین نه قدَر دوغما اولدوغوندان باشیم چیخسین دئیه یازدیغیمی بؤیوک آنالاریما دا اوخویارام.

ـ اؤیکولری­نین یاییملانماسینا تَلَسیرسن هئچ ؟

ـ دوغروسونو دئسم، یوخ. اؤیکو جانیما سینماسا، اونون یایماغینا هئچ­واخت دوشونمه­رم.

ـ شعر یازماق چتین­دیر، یوخسا اؤیکو یازماق؟

ـ شعر یازماغین چتین­لییینی دئییب­لر؛ آمما منجه اؤیکو یازماق داها چتین­دیر.

ـ یازماقدا نه لذت وار کی، اونو داواملاندیریرسان؟

ـ بیلمیرم! آنجاق، «آفتاب آذربایجان» درگیسییله دانیشیغیمدا، "یازیچی یازماقلا سطیر سطیر شهود تجروبه­سینی الده ائدیر..."، کیمی بیر سؤز دئمیشم. یاخشی سؤز دئییل؟!

ـ یازاندا اوخوجویا دا فیکیرلشیرسن­می؟

ـ یوخ، هر ندن اؤنجه اؤزومله کاراکترلریمه دوشونورم. بیرینجی یازیلیشی قورتاراندان سونرا، اوخوجو و باشقا شئی­لری ده نظرده آلیرام.

ـ سوژئتی تاپاندان سونرا، اؤیکویه چئوریلمه­سی نه قدر زامان آپاریر؟

ـ قالیب سوژئتین نه درجه­ده سنی آلیشدیریب ماراقلاندیردیغینا.

ـ اؤیکونون یازیلیشیندا ایلکدن سونونادک ترتیب ایله یازیرسان، یوخسا اوردان بوردان یازیب سونرا "پینه­چی­لیک" ائله­ییرسن؟

ـ چوخراق اولای­لاری زامان ترتیبی ایله یازیرام...

ـ چوخ هانسی واخت­لار و هاردا یازیرسان؟

ـ اوشاقلیغیم کیمی ایندی ده تعطیل گون­لرین گلیب چاتماسیندان سئوینیرم. یازدیق­لاریمین چوخونو جومه­لر یازمیشام، بیر ده یورغونلوق قویورسا، گئجه­لر، هامی یاتاندان سونرا.

  

يازاري محمود مهدوی پنجشنبه 31 مرداد1387 ساعات 0:30 | |

---