حاميدين تنقيدي (1)

آلتینجی بارماق: سیلاحلی یوخسا سیلاحسیز؟

حامد احمدي

تنقدين قايناغي: http://chuxurlar.blogfa.com/

بو یازینی محمود مهدوی­دن اوخودوغوم "بئش بارماق" اؤیکوسونه یازدیم، اونون آدینی تنقید قویماق اولماز، آرتیق اؤیکونون منه باغیشلادیقی حیس­لری بورادا یازماغا چالیشیرام...

دئمه­لی بو اؤیکونون اؤزونون اوخوماسینا آشاغی باغلانتی­یا باش وورون:

http://1001gece.blogfa.com/post-4.aspx

بئش بارماق اؤیکوسو ساده و آخارلی بیر اؤیکودور. او اؤز جامعه­سینین دورومونو عکس ائتمکده­دیر، اوچ یولداشا گؤره دانیشیر و اونلارین قورخولاریندان سؤز آچیر. قورخو نه­دن؟ منجه هر بیر زاددان، حتتا اؤز کؤلگه­لری. بونلار تکجه ال­لرینده­کی سیلاح­لارا گووَنیرلر کی اونلاری دا هئچ بیر زامان ایشلتمه­یه­جکلر. بونو قطعیت­له دئمه­ییم قاییدیر راوی­نین دئدیکلرینه ("هميشه سيلاحلانجاق قورخوموزا بير آز دا آرتيردی. سيلاح­لاری يئره قويان همن زاغ زاغ اسيرديک". و یا خود "گيزلَتديیيميز سيقار قوطولارينی دا توالئته تؤكوب سيلاح­لاری پايلاشاندان سونرا، باشی اوجا قفه‌يه قايیديرديق."  یا دا "آغزيميز يانیرديسا دا سسيميزی ايچيميزده بوغوب جيب­لريميز‌د‌ه­كی گيزلی سيلاح­لاری سیغاللاییردیق.") پارانویا بو کاراکترلرین اوز- گؤزلریندن یاغیر، اونلار خیاباندا یئریمکده دؤرد طرف­لرینی ده گودمه­لیدیلر، بلکه بیری قارانلیقدان چیخیب اونلاری یاخالادی! آمما راوی بیزه بو بئش نفری آرتیق شارلاتان سایاق و یاخود لومپن تانیتدیریر، اونلار قفه­یه گئدیرلر، آمما قلیان یاساق اولاندان سیقار دا چکمیرلر (بوراسی یازیچینین اؤز جامعه­سیله ایلگیده اولوب اونون دردلریله تانیش اولدوغونو گؤستریر.)، قمه و پیچاق و نانچکو دولاندیریرلار و تکجه قالیر اونلارین دار شالوارلار و دابانی یاتمیش باشماق­لاری...

بو آرادا بو آدام­لار نه­دن بیر بئله قورخورلار؟ دئیه­سن بو قورخو هر یئرده آخیر؛ قفه­ده، خیابان­دا، بیرلیک­ده، تنهالیق­دا...

قورخو کاراکترلرین جانینا ایشله­ییب روح­لارین ایسه یئییر. آنجاق من بیر سیرا آخساقلیق­لار دا بو اؤکوده گؤرورم، مثلن بو بئش نفرین عالی تحصیل آلماقلاری بونلارین گؤدویو ایشلرله اوخومور، حتتا بو یازینی بیر تمثیلی یازی دا نظره آلساق منجه یازیچی اگر بو بئش نفری جامعه­نین ضیالی­لاری عکس ائتمک ایسته­ییر (نئجه کی چوخ دا او بیزیم جامعه­نین ضیالی­لارینا اوخشاییرلار؛ قفه­یه گئتمک و...) بونلاری نه­دن لومپن­لرین تیپ ایله بیزه تانیتدیریر؟! دئمه­لی سیلاحلانماق اگر قورخونو آزالتماق اوچون فایدالیدیر بونلارین سیلاحلاری بیر آز غیر-عادی نظره گلیر!

بیرده کی اؤیکو گونئی یازیسیدییسا من چوخ سئوینه­رم او قفه کی قاپیسینا سَلیس تورکجه "معتادلارين بورا گلمه‌يی كسكين حالدا قاداغاندی" یازیلیبدیر، تانییام. بیزلر بو تایدا بیر سیرا یاساق­لار و پروبلئم­لرله اوز-اوزه اولماغیمیزی یازیلاریمیزدا اوزه چکمه­لیییک، الیمیزدن گلن بو دورسا اونو اسیرگه­ممه­لیییک...

 

يازاري محمود مهدوی سه شنبه 21 خرداد1387 ساعات 18:53 | |

---